13. 1. 2016: На Підкарпатю будуть рештавровати замкы

Як інформує протал „Новини Закарпаття‟, Закарпатьска областна рада вырїшыла в рамках розвитку турістічного руху на Підкарпатю придїлити фінанції на рештаврованя історічных замків в тій области.

На засїданю областной рады быв потвердженый Комплексный проґрам всокочіня і хоснованя памяток културнной дїдовизны Підкарпатя на рокы 2016 – 2020. Цїлково ся в тых роках має в рамках проґраму інвестовати 53 міліонів гривень, што є коло 2,1 міліона евр.

До списку пріорітных памяток, котры потребують рештаврованя дістало ся 9 замків. Головно іде о замок в селї Середнє із 12-го столїтя, далше Невицькый замок із 12-го аж 13-го столїтя, мукачівскый Паланок із 14-го аж 17-го столїтя, Чинадієвскый замок із 14-го аж 15-го столїітя, Квасівскый замок із 12-го аж 13-го столїтя, замок Нялаб у селї Королево із 12-го аж 17-го столїтя, Канков у Вигоградові із 12-го аж 14-го столїтя, Хустьскый замок із 11-го аж 12-го столїтя і Ужгородьскый замок, котрый ся датує на 11-те аж 14-те столїтя.

Як перше має ся теперь вытворити проєктова документація, потім буде слїдовати рештаврованя памяток. В рамках проєкту суть придїлены грошы і на вытворїня електронічной датабазы тых памяток. Першы грошы на проєкт спомянутого проґраму підуть у 2016 роцї і буде то конкретно 7,2 міліона гривень, што є коло 285 тісяч евр.

Петро МЕДВІДЬ